Enviado: 15.03.2009 18:41
Esta fin de semana, como xa temos anunciado, seguimos coa limpeza e baldeado con auga a presión das dornas. Así quedarán listas para o alquitrenado, os traballos de carpintería e o pintado que, en cada caso, precisen.
Un momento da limpeza das dornas.
Mais tamén recibimos dúas visitas.
O venres achegouse por alí o sr. Recuna, dono da nave onde gardamos as nosas embarcacións, e que tan xenerosamente nola ten cedida.
E o sábado, dous representantes da asociación escocesa GALGAEL, acompañados por Antón Pais da FGCMF, visitaron as instalacións para observar a tipoloxía e características dos nosos barcos.
Os escoceses mostráronse moi interesados pola tipoloxía das nosas embarcacións.
Nun momento da visita os representantes de GALGAEL chegaron a observar unha dorna arbolada.
GALGAEL é un ambicioso proxecto reivindicativo e de tipo social que, entre as súas moitas actividades, está a da carpintería de ribeira para a recuperación e memoria de embarcacións tradicionais escocesas.
A súa sede está en Govan (Glasgow) e a súa web podédela visitar ao través da nosa ligazón que atoparedes ao final da columna esquerda desta páxina.
Levan feito un feixe delas pero, a verdade, non sei exactamente cantas. Algunhas delas levaban sen construírse 300 anos. Velaí o seu interese por coñecer a tipoloxía de embarcacións tradicionais doutros países coma o noso.