Enviado: 15.07.2012 10:55
Hoxe sábado día 14 de xullo, celebrouse a Regata dos Faros no Grove aproveitando que están nas festas do Carmen.
Saímos pola mañá da praia do Bao cinco dornas : Bazarra, Forza R, Betty Boop, Zenaida e un pouco máis tarde a Rosalía.
Saíndo do Bao
Facía un ventiño fresco que presaxiaba choiva e así foi. Cando xa pasaramos a ponte da Arousa veunos chover unha poallada que mollaba e non facía que estiveras cómodo. Cun ventiño de través, logo duns pequenos refachos ao entrar no Grove, a unha menos cuarto xa estabamos alí.
Santi anunciando a chegada ó porto do Grove
As catro da tarde e na hora, empezou a regata. Participaron vinteoito dornas. A regata desenrolouse rápido, axudou moito ese ventiño constante con algunhas rachas máis fortes, alá no Faro das Umias.
Ao principio as dornas saíron moi rápido e á cabeza púxose a Faísca. Despois de pasar o faro do Bohído, as dornas andaban moi dispersas e non se sabía moi ben quen era a que ía no primeiro posto.
Cando as dornas pasaron a boia situada frente a praia de Rons e colleron a empopada, xa tomou a primeira posición a Rona, seguida da Jalerna que hoxe levaba de patrón a Braulio que, como sabedes, patronea sempre a Nécora. Seguíana a Faísca, a Maristela e a Bazarra, logo viña a Fanequeira e a continuación un grupo de dornas que pelexaba por conquerir a sétima, oitava, novena e décima posicións, eran a Petela, a Chunga, a Mimela e a Lara Doce.
A continuación a Fuxe, a Zenaida , a Betty Boop, a Forza R, a Rosalía e logo outro grupo delas.
Os cinco primeiros postos foron: 1ª Rona, 2ª Jalerna, 3ª Faísca,4ª Bazarra, 5ª Maristela.
Os da Rona e os da Jalerna, primeiros e segundos
A Faísca, terceiros
A Bazarra, cuarta. Lévame, lévame Larry,...
E a Maristela, quinta
Quedaron descalificadas algunhas dornas, entre elas as que viñeron de Ribeira e non chegaron a pasar pola saída.
Ao remate houbo coma sempre un pequeno refrixerio para os participantes e colaboradores e tamén a entrega de trofeos.
No Faro de Vigo fan referencia a esta regata.
