O momento actual do Hidria é desesperado, no seu blog informan da dolorosa situación na que se atopan. Dende a nosa asociación desexamóslle que poidan recuperar o barco si é posible para navegar polas nosas costas. Ánimo Xacobe e Sesé¡

Se queredes mandarlle mensaxes a título individual, no blog tedes o seu enderezo.

E tamén eiquí reciben mensaxes de apoio.

Sobre esta dramática situación tamén escriben dende a FGCMF.

Amais de dar clase de navegación tradicional, organizar e participar en regatas, encontros, festas mariñeiras e pachangas, na e.n.t. colaboramos na divulgación e fomento do Patrimonio Marítimo.



Levándoa á seca


Esta fin de semana, no marco da XVIII Festa da Parrocheira de Ferrol terá lugar unha exposición en seco dunhas 20 embarcacións tradicionais. A exposición está organizada polo Proxecto Europeo Dorna do que xa falamos noutras mensaxes.



A "Noelia", "no coliño" para o camión


Alá levamos tres embarcacións da escola e a gamela de Jorge : a dorna de tope "María" o bote polbeiro de Bueu "O Rebello", a dorna "Noelia" e a gamela "Lui" da ría de Vigo.



O"Rebello" remolcado por dúas mozas



Por enésima vez este ano, fumos ata Tragove en Cambados a cargar embarcacións no camión e colaborar así no fomento da tradición mariñeira.
Como moi ben nos di Fernando nun comentario anterior, son moitas as actividades de verán ao redor da navegación tradicional. Na páxina da Federación tendes o calendario de todas elas.
Onte, a algúns, tocounos as máis "pesadas".



A "María" esperando no camión polas compañeiras de viaxe

Entre crónica e crónica d@s nosa@s expedicionari@s aos mares do Norte, unha noticia de última hora.
Unha das pestanas que temos a proa da páxina enlaza co que está a ser o best seller desta tempada na Escola: o "Manual de Podréns" , escrito por Javi Blanco cando el mesmo iniciábase nisto de ser... un perfecto podrén.


"Merda, o bitoque!"

O sábado día 12 de Agosto, un grupo de intrépidos navegantes da ACD Dorna, partimos de Compostela coa intención de cruzar media Europa para chegar a Glasgow. A idea é participar no evento Sail and Oar que organiza, entre outros, a asociación Galgael, que nos ten visitado a nós no pasado.
Os membros de Dorna imos en representación da FGCMF. Que responsabilidade!!



A intrépida expedición con cara de sono en Lavacolla.

A primeira grande dúbida era se as equipaxes chegarían con nós. Quen confiaba en Iberia, facturou. Quen non tiña fe, levou unha muda e equipaxe de man.



O presidente paseando a súa maletiña por Heathrow adiante.

Despois de navegar todos os ceos de Europa (Santiago-Madrid, Madrid Londón, Londón-Glasgow) e ensinar até os dentes nunha ducia de controis, chegamos ao destino.



No Aeroporto de Glasgow encontrámonos coa expedición basca, procedente de Pasaia.



Outra proba de que as dornas chegan alá onde nós imos.

En Glasgow, despois de aloxarnos no hotel, desprazámonos ao barrio de Govan, onde está o local de Galgael , unha fermosísima e enorme carpintaría de ribeira.



Entrando no local de Galagel.

Alí fomos recibidos cunha festa por parte dos nosos anfitrións. Como fomos os últimos en chegar, só cheiramos o corzo das Highlands que tiñan asado para nós.



De petiscos e conversa.




Cantos escoceses con vestimenta traditional-punk.

E por fin, despois de catorce horas de viaxe... fomos durmir!!