Categoría: os nomes do mar

Despois de varios días de incertidume e misterio, pensamos que é o momento de desvelar cal é o con polo que preguntabamos hai unhas cantas mensaxes. A fotografía foi realizada na última viaxe deste verán: o día que levamos as dornas do Bao a Vilaxoán. O con está no puntal das Sinas, e alguén nos dixo que o coñecíades como as Tousas de fóra.


Vistas as discusións e debates provocadas polo primeiro concurso Cal é este con?, vai unha nova proposta, esta faciliña (até esta blogueira sabe a resposta):

Onde está este con (e este faro)? Como se chama?



Pista: a foto está sacada desde a Peça de Rabo.

Categoría: os nomes do mar

Entanto acabades de apuntarvos para a Cea do Sábado (lembrade, avisade a Salva antes de que acabe o día de hoxe), un grandioso concurso para expertos e expertas navegantes:

Onde está este con? Como se chama?

O premio: o orgullo que dá a sabiduría.



Pista: é unha foto dun dos nosos últimos paseos.

Categoría: os nomes do mar

E xa no título tema para discusión: Lapaghar ou Apaghar? Como dicides na Arousa?



As Cíes ao fondo, a curva do mundo e o con de Lapagar na esquina direita superior da fotografía.

Os nomes do mar traen con eles memorias. E se historias gardan moitas das pedras que asoman entre a marea, a desta é de grande interese, pois protagoniza a que foi considerada a maior traxedia marítima nas costas galegas, a noite do 1 ao 2 de Xaneiro de 1921.

Casualmente, xa daquela exisitía o Faro que preside a fotografía, pero de poco lles serviu aos tripulantes do vapor Santa Isabel, que deu co con de Lapagar cando andaba a facer a manobra para entrar a Vilagarcía polo Carreiro de Sálvora.

Varias son as razóns polas que este naufraxio ficou gravado na memoria popular. Unha, o elevado número de vítimas (mais de 200 persoas). Outra, que foran tres mulleres as que rescatasen, bogando nunha dorna, máis dunha ducia de superviventes.
A historia podedes lela aquí ou escoitala aquí, coa testemuña dunha desas tres mulleres, Cipriana Oujo.

Categoría: os nomes do mar

Un dos puntos que marcan a chegada por mar à Illa de Arousa desde o Pombeiro é o Faro das Lobas.



O Faro das Lobas avisa de que a Arousa está perto.

É curioso o nome deste faro (que supoñemos virá dos cons que asinala) pois non fai referencia à suposta calidade das mulleres mariñeiras, ou das carcamanas, senón que, como moitos outros illotes e cons das costas galegas, indica a presencia nestas terras de lobos mariños. Isto nos recorda no seu blog Manolo Gago.



A Illa de Lobos, en Punta del Este, Uruguay, fotografiada por Sole Fezolla, dános unha idea de como estaría hai séculos o Faro das Lobas. E quizás o Areoso.