Categoría: Aniversario da xeiteira

Este sábado tivo lugar a presentación da exposición que conmemora o XX aniversario do achado da Marina, última lancha de relinga que foi atopada en Caldebarcos. O acto foi no Museo do Mar de Vigo, onde está atracada a Nova Marina que forma parte tamén da exposición.

Ata alí fomos varios navegantes de Dorna e xunto con nós, outros de diversas asociacións que forman parte da FGCMF.


A presentación do acto estivo a cargo de Pablo Carrera, director do Museo e de Víctor Fernández, presidente da Federación.




Víctor e Pablo, no momento da inauguración


A exposición vai sobre as lanchas de relinga: a súa importancia e a súa desaparición nos anos sesenta. Hai imaxes moi interesantes sobre os traballos de desenterramento da Marina, traballos que se fixeron grazas a un grupo de precursores da recuperación do patrimonio marítimo (un deles, Isidro Mariño, estaba entre os presentes) e tamén grazas á escola-taller Aixola, que foi quen materializou a partires dese pecio unha réplica, o que hoxe é a Nova Marina.



Nesta foto de hai vinte anos, vense os restos da "Marina". Isidro Mariño é o da dereita


Víctor destacou que a exposición tamén trata da posta en marcha dun proxecto paralelo: a recuperación do patrimonio marítimo a través da Federación das asociacións que xa daquela funcionaban de forma illada.



Na acta fundacional desta recén nascente Federación, a metade das sinaturas correspondían a mulleres.



A exposición vai estar no Museo ata o día 26 de xuño. Despois irá a Carril co motivo do X Encontro e de aí recorrerá varias vilas. Acompañando á exposición, proxectarase un documental sobre a Marina que non poidemos ver onte, xa que está previsto o seu primeiro pase en Carril, onde a exposición "Mar ao xeito" será inaugurada de xeito oficial.






Juan da Zenaida le atentamente un dos paneis






Na presentación Víctor lembrou un dito que ven ó caso: "hai que coñecer de onde vimos para saber a onde vamos"

Categoría: Aniversario da xeiteira

Como xa sabedes, estes días a xeiteira vai de celebración en celebración para conmemorar o XX aniversario do achado do pecio da súa antecesora.
Hoxe navegará pola ría de Vigo onde se atopa. Concretamente dende Alcabre, no Museo do Mar de Vigo. Eiquí celebrarase mañá unha xornada como ben informan no blog da FGCMF.





Dende a nosa escola queremos unirnos a este aniversario a través
desta selección de fotos da xeiteira Nova Marina, navegando coa nosa xente. Tede o son conectado porque ten música.

A autora desta montaxe fotográfica e musical é Malena.

Categoría: Aniversario da xeiteira

A Nova Marina non para. Onte, domingo, tivo que facer outra travesía dende Bueu, onde estivo dende o venres 20 de maio, ata o Museo do Mar, en Alcabre, xusto ó carón de Samil, na ría de Vigo. Nesta ligazón tedes a xornada na que vai participar a nosa emblemática.

E esta é a crónica do que aconteceu durante a travesía.

En Bueu, ás 9:00 am, hora de partida, a encalmada era moita. Inda que era cedo e os corpos non estaban moi espabilados, as mentes non facían máis que imaxinar a boghada que se nos viña enriba.



Mañá fermosa e en calma


Pois si ten que ser... ten que ser. Os remos da xeiteira puxéronse en movemento.


Ós poucos, fomos saíndo fóra do peirao


De todos xeitos, para que o vento pensara en nós subimos vela, non fora a ser que de súpeto soprara forte...



Malena e Mar tirando das drisas baixo a mirada do patrón




Pero a boghada continuaba, iso si, cada vez máis coordinada e en rigorosas quendas.


De babor: Uxío e Bea



...e de estribor: Mar, Lois e Malena


A paisaxe desta costa era fermosa, dounos tempo a disfrutala, ollade algúns exemplos:



Este é o Cabalo de Bueu


A praia de Tulla, camiño da Punta Udra



Punta Udra, fermosa e eterna, non a dimos pasado!


Pero tiñamos un as na manga, xa que navegantes da ría de Vigo sabían de nós. Dunha parte José Piñeiro, que estaba en contacto telefónico para axudarnos no que fixera falta...


Eiquí chega o noso salvador

Dende as Cíes chegou o racú A Oleira da asociación de Bouzas, con Braulio, Víctor e Carlos de tripulación...


Máis salvadores!


Está claro quen nos ía remolcar


É que o motor é o que ten...


Así que agora cun pouco máis de barullo, pero a máis velocidade, comezamos a verlle a faz a outros cabalos: Os Cabalos de Aldán


Coa testa branca por culpa das javiotas


E tamén apareceu outra fermosura : A Costa da Vela


Cousas da vida: empezou a sopra-lo vento

Como o botiño de José non prestou o servizo que quería, pasou a ser remolcado e o seu patrón incorporouse como tripulante na xeiteira. A todo isto, embarcou coa xeiteira xa en marcha e sen axuda de ninguén: bravo, mariñeiro!



Bea levando a caña na remolcada e José, recén embarcado


Outro monumento natural apareceu no transcurso da travesía: Cabo Home, cos seus marabillosos faros de entrada á ría de Vigo:



O vento ía tendo máis e máis forza, xa case podiamos armar vela


Antes de que comezara a navegación a vela, o noso patrón abandonounos por unha empanada e viño



Uxío nunha imaxe inédita...


Por fin, xa dentro da ría, o vento era bastante/moi fresco. Despois de tanto boghar ( sobre dúas horas ) e remolque ( outras tantas ), a xeiteira navegaría con todo o seu poderío


Uxío, de novo patróneando a Nova Marina


Dentro da ría poidemos contemplar un fenómeno impresionante: a marea bermella que tinguía unha gran superficie de mar.






Algas en descomposición, disque... pero que non cheguen ás bateas!


Unha tronada esperaba a nosa arribada ó Museo, pero o vento puxaba por nós e non tivemos medo


Alá, entre a choiva e as ondas, xurde o Museo do Mar

A tripulación á popa. Case iamos nunha empopada dado o vento do suroeste.





Uxío cun look acorde co momento


No peirao do Museo, Sendi esperaba por nós e axudounos


Sendi botando un cabo


E tamén chegou a Oleira cunha tripulanta honorífica, Bea.

Pero esa é outra travesía...

Categoría: Aniversario da xeiteira

A Nova Marina ponse de novo en movemento. Segue moi atarefada co tema do XX aniversario e agora ten que partir rumbo a Alcabre onde se atopa o
Museo do Mar, na ría de Vigo. É por iso que o próximo domingo 29 de maio sairá do peirao de Bueu, no que agora mesmo está atracada, ás 9:00 am, sempre que o tempo acompañe.



Nesta travesía o patrón será Uxío : @s interesad@s que queiran navegar poden pasar mañá por Vilaxoán ou poñerse en contacto telefónico con Uxío para anotarse.


A Nova Marina en Brest2008, no día de Galicia, levando a bordo á conselleira de Cultura daquela, Ánxela Bugallo.