Categoría: encontros

Esta última fin de semana dous barcos de Dorna participaron no 3º encontro de embarcacións tradicionais do Seixal, frente a Lisboa. A Laranha e máis a Bazarra xunto con outras máis doutras asociacións galegas fomos recibidos con moita hospitalidade e cordialidade polos amigos portugueses, que poden presumir dunha magnífica organización.

A Laranha chegou a primeira hora da tarde do venres e este é o peirao (cais) que atopou para o encontro



Despois de descarga-lo barco chegaba Lima coa Luna



A dorna Sobrada da asociación Fasquía xa se atopaba no mar



Velaí algunhas das embarcacións portuguesas que participaron nos encontros









A descarga dos barcos foi impecable, inda que algúns tiñan dimensións considerables como é o caso da Nosa Sra dos Anxos



Para o sábado 23 celebrouse unha regata na que os barcos galegos non participaron inda que navegaron ó redor. Antes desa regata os patróns tiveron unha reunión da que da fe a imaxe


A regata tivo lugar sobre ás 13:30, hora portuguesa, polo que xantamos antes no recinto dunha antiga fábrica de cortiza, onde a organización distribuía unha comida moi rica


As condicións de vento e temperatura foron moi boas para a navegación. Estas imaxes do transcurso da regata foron feitas dende a Laranha







A Bazarra apareceu de improviso por popa


A Coninha, dos amigos de Portonovo, tamén andaba perto

Xa en terra Dionisio Pereira deu unha conferencia sobre a evolución da carpintería de ribeira en Galicia e sobre o ensino da navegación tradicional.


O domingo pola mañá empezamos a cargar os barcos para regresar á terra. Foi breve a estadía, pero moi fraternal e de moito recoñecemento para a participación da representación galega.




Para ampliar a información sobre este interesante encontro podedes ir á páxina web da FGCMF.

Categoría: actividades paralelas

O domingo 17 de maio celebrouse o día das Letras Galegas en Arousa organizado pola ACDDorna. A choiva estivo presente toda a mañá polo que as distintas actividades que estaban previstas houbo que facelas debaixo dos soportais do auditorio en vez de facerse na praza do concello. De todas formas a participación foi numerosa e a xente da illa acercouse ata alí. Maila choiva, a mañá foi agradable e festiva.

Houbo feira de libros, de parte da libreiría Castelao, con grande abundancia de títulos para os máis pequenos.






Dentro da feira de libros o escritor e debuxante Pepe Carreiro asinou e tamén dibuxou sen parar para os seus incondicionais (maioritariamente pequenos)




Tamén para os máis pequenos houbo un "atrapacontos" que ademais de engaiolar ós rapaces coas súas historias, levábaos de paseio coa súa particular bicicleta.



Anxo Moure e a súa ciclobiblioteca



Dentro do mesmo espacio recitáronse poemas de autores galegos, contando para ilo coa participación do alcalde Manuel Vázquez (inda que non sae nas fotos)




Xa dentro do auditorio o grupo de baile e música da ACDDorna actuou con grande éxito.




Sobre as dúas da tarde xa non chovía e os barcos máis grandes da ENT saíron do muelle de Pao ata o Xufre coa xente que gostara de ir, sempre cun patrón ó mando.

Categoría: actividades paralelas

O próximo domingo 17 de maio a ACDDorna celebra o día das Letras e convida a todo aquel que queira pasar este día con nós: haberá contacontos(Anxo Moure), feira de libros, sinatura de libros por parte de Pepe Carreiro, barcos, actuación do grupo de baile e pandeiretas,...
A diferencia doutros anos o emplazamento vai ser o muelle de pao, onde o concello. Se chove... ó multiusos.

Categoría: travesías

(Por Mª carmen Aguín, da ENT Dorna)

Hoxe día 25 de Abril as embarcacións tradicionais máis grandes da Ría de Arousa navegaron dende os diferentes pobos da Ría ata Vigo, para participar na "Tall Ship 09", que se desenrolará o próximo fin de semana no peirao de transatlánticos e a estación marítima de Vigo. Virán unha chea de embarcacións a vela de un, dous ou máis mastros.
A asociación Dorna levará a Vigo tres embarcacións: Irmandiña, Peza de Rabo e a Nova Marina.
Onte pola tarde no peirao do Xufre sorteáronse as tripulacións, e decidiuse a hora de saída: sete e media da mañá.
Hoxe as sete e media non estaban aínda as tripulacións completas, faltaba xente, ao final saímos as oito e media. Calma borrada.
8:30 Saen as trs embarcacións remolcadas polo barco de batea "Irmáns Allo". Vainos levar ata fóra da ría, esperamos mar de fondo.










O traqueteo do barco rompe a tranquilidade e o silencio da ría. Marro saca fotos, Santi solta como sempre as súas saídas cómicas. Yogui comenta que é mellor que haxa mar de fondo para larga-los aparellos mañá.
9:25 Faltan cinco minutos para levar unha hora remolcados. Neste tempo tomamos un petisco de tortilla de pataca.
10:30 Xa chegamos fóra da ría e o remolque vainos soltar, seguimos sen vento. Non avanzamos nada. Nós que imos na Nova Marina, con Parada de patrón, fomos cara fóra e parecía que nos moviamos un pouco. Os outros parecía que ían para atrás coa marea. Cantamos. Vemos ó lonxe vir a Dorna Meca, parece que avanza moito sen vento, comentamos e cremos que leva un pequeno motor. Ao lonxe aparece o Novo Sofía, o galeón de Vilanova.






12:30 Xunto a Ons e sen apenas avanzar nada remólcanos o Novo Sofía que trae pola popa á Rabandeira e a todos os demáis que foi collendo. Damos bandazos sen parar todo o tempo e imos un pouco mareados. Non remolca aos do Grove.
13:00 Comemos mentres imos remolcados. As ondas son grandes, pero o vento non é abondo para remontalas. Marro vai na caña, logo cambia un pouco Juan.



13:30 Sopla un ventiño xeitoso do oeste e a Rabandeira é a primeira en deixa-lo remolque, logo fixémo-lo tódolos demais. Todos os barcos van emproando cara a Cíes, nós quedamos no medio igual que o Novo Sofía, aínda que a Nova Marina anda máis.

14:55 Estamos entrando na costa da Vela, temos bastante mar e pouco vento e esperando que arrecie o vento para non sentir tanto a mareira. Os barcos que van por fóra parece que collen mellor vento, pero nós vémolos agora e ó pouco non, coa montaña de mar que hai. Non damos chegado a Cabo Home. A Nova Marina menéase moito, xa que collemos as ondas da mareira por un lado e polo outro, as que veñen rebotadas dos cantís de Donón, parecemos un berce co arrandeo.

15:05 Pásanos o Novo Sofía coa axuda do seu motor, segue habendo montañas de mar pero movémonos pouco. Por fóra vemos que o sr. José da Rabandeira, vaille gañando camiño a todas. Detrás vai a Peza de Rabo e a Irmandiña acurtando o camiño e pisándolle os calcañares; detrás a Dorna Meca. Parécenos que andan máis ca nós. Menéase moito a vela e imos para os lados.

15:20 O sr José xa vai pasando as Cíes vindo dende fóra. Podémolo ver ben, porque sae un barco negro e azul e crúzase con el: a vela resalta co negro do casco.
Seguimos navegando e á xente éntralle fame e saca a comida para comer outro pouco. Momentos de baldeira-la vexiga para algúns. Marro vai na caña.

15:30 Ponse Parada na caña e bogan Juan e Yogui para intentar pasar Cabo Home, e non ir contra as pedras, vaise facendo con traballo, polas ondas.

16:00 Levántase un vento fresco do oeste porque ven a choiva e cruzamos Cabo Home tódalas embarcacións, nós imos á velocidade dun lóstrego, tódolos tripulantes facendo banda e Yogui gravándonos coa cámara do seu móvil, para que non esquezamos este momento. Fixámonos na vela que fai unha arruga fea e cremos que afrouxou o chicote do penol.

Despois da nevada







16:15 Facemos unha trasluchada para entrar na ría de Vigo. Antes xa a fixeran a Meca e a Irmandiña que queda agardando pola Peza de Rabo. Entramos xa na ría e imos gañándolle terreo á Meca, que se arrimou máis á terra. Nós imos polo medio e canto máis nos internamos na ría cada vez hai menos vento e mareira, pero movémonos. Ao lonxe vemos que entran no porto a Rabandeira e o Novo Sofía. Poñemos rumbo ó peirao. A Dorna Meca co seu motor adiántanos por estribor.

18:00 Entramos no porto. Xa están amarrados algúns barcos. Logo entramos nós, recollemos vela, limpamos o barco e saltamos ao pantalán. Ao pouco chega a Irmandiña e, detrás, a Peza de Rabo. Tódalas tripulacións fan o mesmo que fixemos nós. Preparámonos para marchar no tren ata Vilagarcía e de alí ata Arousa collé-lo coche que quedou no Xufre. Dalí a casa a descansar. Hoxe foi un día completo.