Enviado: 28.06.2009 18:33
A tempada de regatas deste ano comezou cunha especial preocupación por garantir a seguridade en todas as carreiras: obriga de ter as embarcacións aseguradas, de levar chalecos salvavidas a bordo, de ter flotabilidade nos barcos. E o día de onte demostrou que todas estas novidades son necesarias. Aínda que resultou frustrante para case todas as tripulacións, a organización veuse na obriga de suspender a XXV Volta á Arousa por causa do vento, que facía perigar a seguridade das persoas participantes.
Comezou a actividade cedo. A edición da Volta à Arousa deste ano era especial: facía 25 anos.
No Bao preparouse unha grande carpa na que o público podía gozar do visionado de películas con imaxe de anteriores voltas e de dúas exposicións. Unha, a dos 30 anos da ACD Dorna.
A segunda, especial para esta edición desta regata: cartaces con todas as dornas vencedoras nos 25 anos de historia da Volta a Arousa.
A medio día comezou a aumentar a actividade. Chegaban tripulacións, dornas, e perto das catro da tarde xa andaban todas no mar a aparellarse. As predicións xa falaban de ventos fortes, pero ninguén quixo desanimarse.
Ás catro da tarde deuse a saída con respectuosos refachos de vento xa na enseada do Bao. A inscrición foi parella á importancia do evento: 62 dornas tomaron a saída. Chegaron de Ribeira, Cambados, Vilanova, Ogrobe, Portonovo, Cangas e, por suposto, da Arousa.
A saída desde o mar.
Xa camiño da Pasante da Ponte, onde estaba situada a segunda boia, deu problemas o vento. Unha dorna deu volta, tronzaron un par de paus, houbo varios abandonos...
Cando as dornas en cabeza da regata estaban chegando a Carreirón, a organización decidiu suspender a carreira, visto o estado do mar, o aumento da forza do vento e a perigosidade de facer en popada a metade da regata, soprando como sopraba de sur.
E as dornas comezaron a chegar de volta:
Aínda non eran as sete da tarde e xa todas as tripulacións estaban a recoller aparellos e barcos.
Nun ambiente festeiro e animado, a pesar dos contra-tempos, a xente agardaba pola decisión da organización. Finalmente optou por convocar ás persoas participantes para facer o intento outra tarde deste verán e non deixar sen gañador o cartaz da 25 Volta á Arousa.
Tripulacións á espera de novas
O que si tivo bo fin foi a I Volta á Illa en Bici, que chegou na hora prevista, pero sen poder compartir boa parte do recorrido por terra coas dornas no mar.
Para sacar o mal sabor de boca, acabou o día con petiscos para todo o mundo e agasallo especial para todas as tripulacións: unha insignia comemorativa destes 25 anos.
