Categoría: escola

Mensaxe a@s dorneir@s:
Pasade este solsticio o mellor que podades.
Pasádeo ben que, cando as nosas dornas volten ao mar, pasarémolo mellor.

Categoría: asociacións

O vindeiro sábado 12 vai ter lugar en Abelleira a presentación en sociedade do proxecto de recuperación do chamado Galeón de Abelleira. Ben sabedes que o devandito galeón atópase no asteleiro de Mougán en Arousa xunto o noso Rei do Mar, compartindo madeiras, serruchos e ai! ... aixolas.
O que non compartirán é a bañeira. Parece que o grupo de traballo decidiu non poñe-la despois de deliberalo.

Aquí, no blog dos nosos ben queridos compañeiros de Abelleira, tendes tódala información sobre o tema. Se podedes ir non volo perdades.

Iste é o cartaz do evento:

E os galeóns voltarán navegar polas nosas rías.

Categoría: museo

Como Dorna é medio republicana e medio atea, pasa as pontes de constitución inmaculada a traballar, para que non se diga.
E así, as tardes do luns e do martes, houbo xuntanza en Vilaxoán para pór a punto o Espazo Expositivo. Ademais diso, o martes de mañá, levamos (por fin!!) as dornas que andaban a invernar no Bao para a nave. Como vedes, feriados completos.

As persoas que coñezades a nave de Vilaxoán e levedes unha temporada sen ir por alí, teredes unha grande sorpresa cando voltedes, porque as fotos desmerecen o que impresiona o novo espazo que habilitamos.

Nel xa están dispostas as embarcacións, de diferentes tipoloxías, que temos na asociación: a dorna polbeira, por suposto, a dorna de tope, a dorniña, o loro, a buceta, o racú, algunhas artes de pesca e até a traíña colgante, innovadora tipoloxia local.



Colocando a buceta Laranha onde mandaba Patricia, a deseñadora de interiores da ACD Dorna.



Temporal na costa recén pendurado da parede.



Todo ten as súas traseiras: a tramoia de todo o decorado está feita con paus, varas de portar e cabos varios (a ver quen ten a dorna completa cando comece a tempada...)

Categoría: mantemento dornas

Dada a inminente inauguración do novo espazo técnico-expositivo que estamos a montar na nave de Vilaxoán, urxe convocar a tódol@s soci@s e simpatizantes de Dorna e das embarcacións tradicionais para que, despreguizados e contra vento e marea, vos acheguedes por alí o luns 7 e martes 8 para remata-lo traballo que inda temos pendente.
Comezaremos ás 16:30 horas para aproveitar ao máximo a luz do día e remataremos a saber cando e onde.


Entre tod@s, "si, podemos".

Se non saístedes esta ponte a facer turismo, non vos laiedes. Tendes outra alternativa:
Turismo Patrimonial en Vilaxoán.
Traballo de campo coa cultura inmaterial, boa compañía e vistas ao mar. Totalmente de balde: non se vos cobrará o traballo que fagades.
Agardámosvos!


O máis difícil xa está feito.