Categoría: regatas

Xa temos novas datas confirmadas para a Volta à Arousa e para a Regata do Bao.

A XXVI Volta à Arousa celebrarase o próximo sábado 7 de Agosto. Como xa nos colocamos na metade do verán e a volta é a proba máis longa do calendario, debemos adiantar o seu comezo às 16.00 horas (sen demoras, plis).

Isto obriga tamén a trasladar de día a Regata do Bao, que tiña esa data reservada, pasando a celebrarse o Domingo (atención: do-min-go) 15 de Agosto pola mañá (confirmaremos hora proximamente).


Que os ventos nos permitan botar vela arriba!

Categoría: fotoló

E non foi por non avisar... Dixémolo desde o comezo. Houbo quen por iso nos chamou mixiricas e aghoiros. Pero os riscos estaban aí.

O novo carril-bici que atravesa a praia da Canteira dificulta as actividades da ENT Dorna. A entrada e saída de navegantes do lugar onde gardamos os aparellos choca (nunca mellor dito) coa actividade de ciclistas e paseantes que fan uso do carril.

E avisamos, que a visibilidade non era boa, que hai unha curva perigosa vindo da local de piraguismo, que non hai limitación de velocidade nin aviso de perigo.

E claro, tiña que pasar: chegou o choque!

E o primeiro ciclista do ano comeu un pau de dorna alto como un día sen pan. As aseguradoras non se fan cargo do arranxo dos dentes...


Teremos que comezar unha campaña tipo DGT?