Categoría: actividades paralelas



Por se non o sabedes, a Arousa está estes días de festa. O pasado 14 de Setembro a famosa ponte das correntadas e os toques de pau na pasante, fixo 25 anos.

O Concello organizou durante este ano unha comisión que se encargou de programar as actividades festeiras desta semana. Desa comisión formou parte, como non, a ACD Dorna.

Unha das propostas que foron arriba foi a de realizar e vender camisolas comemorativas dos 25 anos. O Concello propuxo que, en vez de facer ese labor eles, o fixese algunha asociación que puidese aproveitar o evento para financiarse. E xusto foi á ACD Dorna a quen lle tocou a sorte.

Durante estes días funcionará un posto de venta no Multiusos da Arousa, coincidindo coa apertura da exposición fotográfica e as actividades musicais, todos os días a partir das 19.00 (atención, hora real, non hora de dorna); e o sábado, na praza do Regueiro, toda a noite. O importante: fan falta persoas voluntarias para atender o chiringuito de aquí ao Sábado.

As persoas que teñades disponibilidade poñédevos en contacto con nós para organizar as quendas.
Chamade a Xabi Pena (646854598).

Categoría: escola

Parece ser que estes últimos días de verán que se aproximan ó equinoccio de outono e coincidindo coa lúa nova,... en fin que estamos tendo as máis grandes enchentas de mar de todo o ano. A escola é un sitio especial para o tema das mareas. Cando estas son moi fortes, atravesan por filtración as brañas de frente a piragüismo e tachán!...quedamos aneghadiños.



A natureza non entende de coches, carril-bici, nin nada... tira para diante e xa está.



Pero na escola temos mariñeiros que tanto navegan en profundas augas como que boghan tranquilamente na pequena lagoa que se formou diante do noso pañol.



Vede como Lino andaba de aquí para alá buscando clientela para cruzar ata a praia.



Pena que esa tarde non había rapaces pequenos para levar senón faríamos unha nova sección: Paseos en ghameliña



Ollade como o carril-bici desaparece e a auga case entra na escola.

Categoría: asociacións

Con vento do norte saímos o sábado do Bao con tempo suficiente para asistir ao I Memorial Tito Silva que ven de celebrarse por primeira vez en Cambados.
Levamos dúas dornas de tope: a “Peza de Rabo” e a “Nova Maruxa” e, ademais, a lancha xeiteira “Nova Marina”, a dorna “Irmandiña”, a gamela “Descalciña” e a buceta “Laraña”, tamén coñecida como “Maruxa”.

Canda nós saiu a dorna “Lavanqueira” tripulada polos compañeiros da asociación Fasquía.
Non navegou a “María”, outra dorna de tope recuperada pola E.N.T., que polas súas características especiais, ainda non lle temo-lo aparello da vela.



Era o día das dornas de tope e a"María" fixo amago de rebelarse ao saber
que non ía ao Memorial

No porto de Cambados reunímonos coa “Airexa” a dorna de tope protagonista do Memorial tal e como nos conta Fernando no seu blogue.



A "Airexa" e "A Nova Jorita" saudándose


A convocatoria con se-la primeira foi un éxito de participación.
Amais das nosas embarcacións, e as xa nomeadas, asociacións de Cambados, Ogrobe e Sanxenxo aportaron as máis emblemáticas de seu.

Así vimos navegar a “A Nova Jorita”, a dorna “Meca”, a dorna “Sara”, a “Muller de Balboa” e a “Pelexa” entre outras. Moito vento entre a boia do porto e o faro do Ourido que delimitaron o circuito para lucimento da nosa tradición mariñeira.



Embarcacións do Memorial no peirao de Cambados

Os organizadores, familiares de Tito Silva e tripulantes da "Airexa", agradeceron, emocionados, a colaboración de tod@s mentras merendábamos.

Categoría: encontros

Cando chegamos o pasado venres pola tarde ao peirao de Curuxeiras e despois de deixar a “Bandalha” e a “Zenaida” enfiladas na rampla, o primeiro que albiscamos foi a gamela coruxeira “ Lui”.


Chalanas e bote "Pulpeiro" na Mostra

Era a primeira das embarcacións da mostra en seco das distintas "tipoloxías galegas” varadas ao longo do peirao.
A partir dela, botes de Ferrol, de Ribadeo, bucetas, chalanas, a dorna de tope, a gamela da Garda, o bote de Carril, o bote polbeiro de Bueu, traíñas e por suposto as dornas de Arousa foron ocupando o seu lugar deixándose aparellar polas mans expertas de Bedoya, Arturo, María Jesús e demais compañeir@s do Clube de Vela de FERROL, sección tradicional.


A buceta "Punta Fiateira"

Despois dos saúdos e de axudarlles un pouco coa colocación dos barcos chegamos á carpa da Federación coa intención de montala, pois alí tería lugar, o sábado pola mañá, unha mostra de redeiras e a presentación do Proxecto DORNA.
Levounos tempo decidir a mellor ubicación do aparello de rede, pero sobre todo levounos tempo atopa-lo botón de encendido da pantalla da televisión. Por non poñe-los lentes, coquet@s!



Algúns deseños para a carpa foron descartados por obvios


Nese tempo ían entrando no porto as primeiras embarcacións da xuntanza.

Chamounos a atención un barco pesqueiro danés de 1947, o “Tina Husted”, moi ben conservado que leva varios anos fondeado en Sada onde recalou nunha pretendida travesía ata o Caribe.

Hoxe é propiedade de David, un británico que vive entre o seu país e o noso e non sei se algún outro máis. Os que fostedes a Brest hai dous anos é posible que o topárades por alí.


O "Tina Husted" amarrado no porto


Xa de noite ceamos no medio dunha regueifa Ferrol vs. Arousa que, como os mesmos anfitrións recoñeceron no seu blogue, ganámola nós por goleada.

Ao día seguinte foi o día da navegación pola ría e inda que ía pouco vento, chegounos para podermos disfrutar da emoción de navegar nun mar de barcos de tradición como son os das asociacións Nordés, Patexeiros, Redes, Sada, Clube Náutico de Acoruña e Clube de Mar de Ferrol, os anfintrións.


Conflicto Norte-Sur o primeiro día de navegación: dornas arousás abordan o "Ría de Ferrol"


Finalmente, fixéronse coa caña do trincado


A ninguén lle arredou a presencia dun gaseiro, unha ameaza flotante que periódicamente teñen que padece-los habitantes desta fermosa ría.


Tradición face destrucción


Despois de comer, máis navegación, esta vez a bordo do “Tina Husted”.
Os botes ártabros, as bucetas, galeóns, trincados, as nosas ben prezadas dornas seguíannos a popa.


Velas tradicionais a popa do "Tina Husted"

No pesqueiro danés armamos trinquete, maior e mesana.
Tamén, por falta de vento, nas manobras, houbo que “arma-lo motor”, ese “aparello” tan denostado e pouco recoñecido na e.n.t. de Arousa .


De volta da navegación



PACHANGA DO BAO E REGATA LAJAREU

Xa era noite, cando soubemos pola información que nos chegou da Escola, que a Pachanga do Bao foi un éxito de navegación e de xente, que gañou a dorna tripulada por Lino e José Luis e que houbo merenda e festa para celebrala.

Luis da Fonte fixo un vídeo da regata e xa o temos eiquí.


Tamén soubemos do éxito da E.N.T. na Regata de Lajareu en Ribeira. Atá alí foron tres dornas da Escola, a “Jalerna”, a “Petela e a “Cariñosa”.

O resultado foi que Braulio e máis Carterola chegaron en primeiro lugar na “Jalerna”, Pimon e Lino fillo, de terceiros na “Petela”, mentras que en segundo lugar foi unha dorna de ADM de Ogrobe, a "Rona".
Noraboa a todos!

(Se conseguimos fotos poñerémolas no blogue)




Despois dunha noite de música e festa, o domingo fumos os primeiros valentes en saír a navegar.
De novo o pouco vento e a ameaza dun novo gaseiro coa conseguinte orde de prohibi-la navegación pola ría a partir das 14:00 horas, non impediu que cumpliramos a tradición de ir come-lo polbo á fermosa Mugardos para constatar que seguen a preparalo tan ben como na Arousa.


O flatulento mercante entrando na ría

Ao acabar de comer na carpa mariñeira de Curuxeiras comezou o reparto dos agasallos a tódalas embarcacións participantes da xuntanza.
Eran moitas polo que tocounos agardar un montón de tempo polo premio especial da Parrocheira: un magnífico xamón, que noutras edicións era o premio da regata do sábado, pero que actualmente, agasállase á asociación que máis o teña merecido, según o criterio dun xurado imparcial (ou sexa, os organizadores).


Lois recolle un dos premios pasando moi preto do xamón


E sabedes a quen lle tocou?
A nós, os de Dorna.
Moito obrigad@s, anfitrións!

Uxío foi o encargado de "inaugura-la" primeira tallada para compartir as seguintes co resto da tripulación da Parrocheira.


Uxío "inaugurando" o xamón


En fin, unha fin de semana intensa onde se puido disfrutar de bo tempo, gastronomía, regatas, cultura mariñeira, pachangas e, sobre todo, moitísimo patrimonio en embarcacións tradicionais.

Despois de axudar a recolle-los barcos da exposición e a carpa da Federación cargamo-las dornas e marchamos para casa cun bocata de xamón que Maricarmen amañounos, non sabemos en que momento.

Hai fotos no álbum2 da escola.